ആർ. ചേരൻ: കത്തുന്നൊരു ജന്മഭൂമിയെ വാക്കുകളിൽ പേറിയ കവി

മീര കമല( എഴുത്തുകാരി, കവി, അക്കാദമിക് പ്രവർത്തക)

 

രുദ്രമൂർത്തി ചേരൻ

യുദ്ധവും പലായനവും പ്രതിരോധവും ഓർമ്മകളും ചേർന്ന് ഒരു ജനതയുടെ മുറിവുകളെ അനശ്വരമായ കാവ്യഭാഷയിലേക്ക് പരിവർത്തനം ചെയ്ത ഈഴം തമിഴ് കവി, പത്രപ്രവർത്തകൻ, പണ്ഡിതൻ.ചില കവികൾ ചരിത്രത്തെക്കുറിച്ച് എഴുതുന്നു. മറ്റു ചിലർ ചരിത്രത്തിന്റെ ഭാഗമായിത്തന്നെ ജീവിക്കുന്നു. എന്നാൽ, അപൂർവം ചില കവികളുടെ ജീവിതം അവർ പ്രതിനിധാനം ചെയ്യുന്ന ജനതയുടെ ചരിത്രത്തിൽനിന്ന്വേ ർതിരിച്ചറിയാനാവാത്തവിധം ഇഴചേർന്നിരിക്കും. അത്തരമൊരു കവിയായിരുന്നു രുദ്രമൂർത്തി ചേരൻ.

2026 നവംബർ 18-ന് ടൊറന്റോയിൽ, 66-ാം വയസ്സിൽ ചേരൻ വിടവാങ്ങിയെന്ന വാർത്ത തമിഴ് സാഹിത്യലോകത്തിനും വിശാലമായ ബൗദ്ധിക സമൂഹത്തിനും തീരാനഷ്ടമാണ്. കവി, പത്രപ്രവർത്തകൻ, നാടകകൃത്ത്, അക്കാദമിക് പണ്ഡിതൻ എന്നീ നിലകളിൽ ശ്രദ്ധേയനായ ചേരൻ സമകാലിക ഈഴം തമിഴ് സാഹിത്യത്തിലെ ഏറ്റവും സവിശേഷമായ ശബ്ദങ്ങളിലൊന്നായിരുന്നു. അഞ്ച് പതിറ്റാണ്ടിലേറെ നീണ്ട സർഗാത്മക ജീവിതത്തിലൂടെ, അക്രമവും പലായനവും പ്രതിരോധവും ജന്മനാടിനോടുള്ള അഗാധമായ അഭിവാഞ്ഛയും അടയാളപ്പെടുത്തിയ ഒരു ജനതയുടെ വേദനകൾക്ക് അദ്ദേഹം കവിതയുടെ ഭാഷ നൽകി.

എന്നാൽ, അദ്ദേഹത്തിന്റെ സാഹിത്യ-വൈജ്ഞാനിക സംഭാവനകൾക്കപ്പുറം, അദ്ദേഹത്തെ അടുത്തറിയുന്നവർക്ക് ഈ വിയോഗം വ്യക്തിപരമായൊരു നഷ്ടം കൂടിയാണ്. എനിക്ക് ചേരൻ ഒരു പ്രിയ സുഹൃത്തായിരുന്നു. പുസ്തകത്താളുകൾക്കപ്പുറത്തേക്കും നീളുന്ന ബൗദ്ധികമായ അന്വേഷണങ്ങളും സാഹിത്യബോധവും മനുഷ്യാനുഭവങ്ങളോടുള്ള ആഴമുള്ള പ്രതിബദ്ധതയും അദ്ദേഹത്തിന്റെ വ്യക്തിത്വത്തിന്റെ ഭാഗമായിരുന്നു.

തീയിൽ നിന്ന് പിറന്ന കവിത

1960-ൽ യാഴ്പാണത്തിനടുത്തുള്ള അലവെട്ടിയിലാണ് ചേരൻ ജനിച്ചത്. സാഹിത്യപാരമ്പര്യം നിറഞ്ഞുനിന്ന ഒരു കുടുംബാന്തരീക്ഷത്തിലായിരുന്നു അദ്ദേഹത്തിന്റെ വളർച്ച. ആധുനിക ശ്രീലങ്കൻ തമിഴ് മഹാകവി ടി.രുദ്രമൂർത്തി യാണ് പിതാവ്. ബാല്യകാലത്തെ സാഹിത്യാന്തരീക്ഷവും അക്കാലത്തെ രാഷ്ട്രീയ-സാമൂഹിക യാഥാർഥ്യങ്ങളുമായുള്ള സമ്പർക്കവും ചേർന്നാണ് പിൽക്കാലത്ത് ലോകം അറിഞ്ഞ കവിയുടെ സർഗാത്മകബോധം രൂപപ്പെട്ടത്.യാഴ്പാണം സർവകലാശാലയിൽ ജീവശാസ്ത്രം പഠിച്ചുകൊണ്ടിരിക്കുമ്പോഴാണ് ആധുനിക ശ്രീലങ്കൻ ചരിത്രത്തിലെ ഏറ്റവും ദാരുണമായ സാംസ്കാരിക ദുരന്തങ്ങളിലൊന്നിന് ചേരൻ സാക്ഷിയാകുന്നത്.1981 മെയ് 31-ന്റെ രാത്രി യാഴ്പാണം പൊതുഗ്രന്ഥശാല അഗ്നിക്കിരയായി. 95,000-ത്തിലധികം പുസ്തകങ്ങളും കൈയെഴുത്തുപ്രതികളും ചരിത്രരേഖകളും കത്തിനശിച്ചു. അത് കേവലം പുസ്തകങ്ങളുടെ ഒരു ശേഖരമായിരുന്നില്ല. തലമുറകളിലൂടെ കൈമാറിവന്ന തമിഴ് വിജ്ഞാനത്തിന്റെയും പാണ്ഡിത്യത്തിന്റെയും സാംസ്കാരിക ഓർമ്മകളുടെയും ഒരു ജനതയുടെ സ്വത്വബോധത്തിന്റെയും അമൂല്യമായ നിക്ഷേപമായിരുന്നു ആ ഗ്രന്ഥശാല.

സർവകലാശാലാ ഹോസ്റ്റലിൽ നിന്ന ചേരൻ ആ തീപിടിത്തത്തിന് സാക്ഷിയായി. ഗ്രന്ഥശാലയുടെ നാശം അദ്ദേഹത്തിന്റെ ജീവിതത്തിലും കവിതയിലും നിർണായക അനുഭവമായി. അക്രമം മനുഷ്യജീവനുകളെയും വീടുകളെയും മാത്രമല്ല, ഒരു ജനതയുടെ ഓർമ്മകളെയും ഭാഷയെയും സാംസ്കാരിക പൈതൃകത്തെയും മായ്ച്ചുകളയാൻ ശ്രമിക്കുമെന്ന തിരിച്ചറിവായിരുന്നു അത്. 1982-ൽ പ്രസിദ്ധീകരിച്ച ഇരണ്ടാവതു സൂരിയ ഉദയം (രണ്ടാമത്തെ സൂര്യോദയം) എന്ന ആദ്യ കവിതാസമാഹാരം ഈ കലുഷിതമായ ചരിത്രപശ്ചാത്തലത്തിൽ നിന്നാണ് പിറന്നത്. 1984-ൽ യമൻ എന്ന സമാഹാരവും പുറത്തുവന്നു. 1985-ൽ പ്രസിദ്ധീകരിച്ച മരണത്തിൽ ജീവിക്കും (മരണത്തിനുള്ളിൽ നാം ജീവിക്കും) എന്ന സമാഹാരത്തിന്റെ സഹസംപാദകനായും അദ്ദേഹം പ്രവർത്തിച്ചു. തമിഴ് പ്രതിരോധ കവിതയുടെ ശ്രദ്ധേയമായ സമാഹാരമായിരുന്നു അത്.

ഈ ആദ്യകാല കൃതികൾ ചേരനെ വേറിട്ടൊരു കാവ്യശബ്ദമായി അടയാളപ്പെടുത്തി. ദുരിതങ്ങളുടെ രേഖപ്പെടുത്തലിൽ മാത്രം ഒതുങ്ങുന്നതായിരുന്നില്ല അദ്ദേഹത്തിന്റെ കവിത. അക്രമത്തിന്റെ വൈകാരികവും ധാർമികവുമായ പ്രത്യാഘാതങ്ങൾ, മനുഷ്യജീവിതത്തിന്റെ ദുർബലത, അടിച്ചമർത്തലുകൾക്കിടയിലും ആത്മാഭിമാനം കാത്തുസൂക്ഷിക്കാനുള്ള മനുഷ്യന്റെ നിശ്ചയദാർഢ്യം — ഇവയെല്ലാം അദ്ദേഹത്തിന്റെ കവിതകളിൽ ഇടംപിടിച്ചു.

കവിതയ്ക്കപ്പുറം: പത്രപ്രവർത്തനവും വിയോജിപ്പിന്റെ ഊർജവും.

ചേരനെ സംബന്ധിച്ചിടത്തോളം എഴുത്ത് ഒരിക്കലും സാമൂഹിക യാഥാർഥ്യങ്ങളിൽനിന്ന് വേറിട്ടുനിന്ന ഒന്നായിരുന്നില്ല. സത്യം, നീതി, ചോദ്യം ചെയ്യാനുള്ള സ്വാതന്ത്ര്യം എന്നിവയോടുള്ള അദ്ദേഹത്തിന്റെ പ്രതിബദ്ധത തന്നെയാണ് പത്രപ്രവർത്തനരംഗത്തെ ഇടപെടലുകളിലും പ്രതിഫലിച്ചത്.1984-ൽ യാഴ്പാണത്തിൽ പ്രസിദ്ധീകരിച്ചിരുന്ന ഇംഗ്ലീഷ് വാരികയായ സാറ്റർഡേ റിവ്യൂവിൽ അദ്ദേഹം ചേർന്നു. പത്രസ്വാതന്ത്ര്യത്തിനും ന്യൂനപക്ഷാവകാശങ്ങൾക്കും വേണ്ടി നിലകൊണ്ടിരുന്ന പ്രസിദ്ധീകരണമായിരുന്നു അത്. സ്വതന്ത്രമായ അഭിപ്രായപ്രകടനങ്ങൾ ഭീഷണികളും അപകടങ്ങളും നേരിട്ടിരുന്ന കാലഘട്ടത്തിലായിരുന്നു അദ്ദേഹത്തിന്റെ പത്രപ്രവർത്തനം.

1987-ൽ ശ്രീലങ്ക വിട്ട് നെതർലൻഡ്സിലെത്തിയ ചേരൻ, ഹേഗിലെ ഇന്റർനാഷണൽ ഇൻസ്റ്റിറ്റ്യൂട്ട് ഓഫ് സോഷ്യൽ സ്റ്റഡീസിൽ ബിരുദാനന്തര ബിരുദപഠനം പൂർത്തിയാക്കി. രണ്ടര വർഷത്തിനുശേഷം ശ്രീലങ്കയിൽ തിരിച്ചെത്തിയ അദ്ദേഹം, മൂവ്‌മെന്റ് ഫോർ ഇന്റർ-റേഷ്യൽ ജസ്റ്റിസ് ആൻഡ് ഇക്വാലിറ്റിയുടെ പ്രസിദ്ധീകരണമായ തമിഴ് പത്രം സരിണിഹർ സ്ഥാപിക്കുന്നതിൽ പങ്കാളിയായി.1993-ൽ വീണ്ടും ദ്വീപ് വിടേണ്ട സാഹചര്യമുണ്ടായി. തുടർന്ന് കാനഡയിലെ ടൊറന്റോയിൽ സ്ഥിരതാമസമാക്കിയ അദ്ദേഹം സാഹിത്യ-പത്രപ്രവർത്തന-വൈജ്ഞാനിക പ്രവർത്തനങ്ങൾ തുടർന്നു.യാഴ്പാണത്തിൽനിന്ന് നെതർലൻഡ്സിലേക്കും അവിടെനിന്ന് കാനഡയിലേക്കുമുള്ള അദ്ദേഹത്തിന്റെ യാത്ര കേവലം ഭൂമിശാസ്ത്രപരമായൊരു സഞ്ചാരമായിരുന്നില്ല. എണ്ണമറ്റ ശ്രീലങ്കൻ തമിഴർ അനുഭവിച്ച പലായനത്തിന്റെ വലിയ ചരിത്രത്തിന്റെ ഭാഗം കൂടിയായിരുന്നു അത്. എവിടെ ജീവിച്ചാലും തന്റെ ജനതയുടെ ചരിത്രത്തോടും സ്വത്വത്തോടും അനുഭവങ്ങളോടുമുള്ള സർഗാത്മകവും ബൗദ്ധികവുമായ ബന്ധം അദ്ദേഹം കാത്തുസൂക്ഷിച്ചു.

ഒപ്പം സഞ്ചരിച്ച ജന്മനാട്

പലായനം സ്വന്തം നാടുമായുള്ള മനുഷ്യന്റെ ബന്ധത്തെ സങ്കീർണമാക്കുന്നു. ചിലർക്ക് അത് ഗൃഹാതുരത്വത്തിന്റെ ഓർമ്മയാണ്; മറ്റു ചിലർക്ക് ഒരിക്കലും ഉണങ്ങാത്ത മുറിവും. ചേരന്റെ കവിതകളിൽ ജന്മനാട് ഒരേസമയം ഭൂമിശാസ്ത്രപരമായ യാഥാർഥ്യവും വൈകാരികമായ ഭൂപ്രകൃതിയുമാണ്.തകർന്ന വീടുകൾ, നഷ്ടപ്പെട്ട ബാല്യങ്ങൾ, വിജനമായ തെരുവുകൾ, നിശ്ശബ്ദമാക്കപ്പെട്ട ചരിത്രങ്ങൾ, സംഘർഷങ്ങൾക്കിടയിൽ വേർപിരിഞ്ഞ കുടുംബങ്ങൾ — ഇങ്ങനെ അനേകം ജീവിതാനുഭവങ്ങൾ അദ്ദേഹത്തിന്റെ കവിതകളിൽ നിറഞ്ഞുനിൽക്കുന്നു. കടലും ഓർമ്മയും പ്രണയവും പലായനവും വേരുകളിലേക്കുള്ള മടക്കവും വ്യക്തിജീവിതത്തിന്റെ അനുഭവങ്ങളെ ഒരു ജനതയുടെ രാഷ്ട്രീയ ചരിത്രവുമായി ബന്ധിപ്പിക്കുന്നു.

നീ ഇപ്പോൾ ഇറങ്ങും ആറ് (2000), മീണ്ടും കടലുക്ക് (2004) എന്നീ സമാഹാരങ്ങൾ അദ്ദേഹത്തിന്റെ കാവ്യലോകത്തിന്റെ വ്യാപ്തി വ്യക്തമാക്കുന്നു. പ്രത്യേകിച്ച് കടൽ അദ്ദേഹത്തിന്റെ കവിതകളിൽ ആവർത്തിച്ചുവരുന്ന ഒരു സാന്നിധ്യമാണ് — ബാല്യത്തിന്റെ ഓർമ്മകളും വേർപാടുകളും തിരിച്ചുപോക്കിന്റെ അഭിലാഷവും കൂടിച്ചേരുന്ന ഒരു ഭൂപ്രകൃതി.

എന്നാൽ, യുദ്ധത്തിന്റെയും പ്രവാസത്തിന്റെയും മാത്രം കവിയായി ചേരനെ വിശേഷിപ്പിക്കുന്നത് അദ്ദേഹത്തിന്റെ കാവ്യലോകത്തെ പരിമിതപ്പെടുത്തും. പ്രണയം, ആർദ്രത, അനിശ്ചിതത്വം, മനുഷ്യബന്ധങ്ങൾ, സ്വത്വത്തിന്റെ സങ്കീർണതകൾ എന്നിവയും അദ്ദേഹത്തിന്റെ രചനകളിൽ ആഴത്തിൽ പ്രതിഫലിക്കുന്നു. വ്യക്തിപരവും രാഷ്ട്രീയവും അദ്ദേഹത്തിന്റെ കവിതയിൽ ഒരിക്കലും പൂർണമായി വേർപെട്ടുനിന്നില്ല. ഒരു ജനതയുടെ വേദന വ്യക്തികളുടെ ജീവിതാനുഭവങ്ങളിലൂടെ ആവിഷ്കരിക്കപ്പെടുമ്പോൾ, സ്വകാര്യമായ വികാരങ്ങൾക്കുപോലും വിശാലമായ ചരിത്രത്തിന്റെ പശ്ചാത്തലം കൈവന്നു.

ദി സെക്കൻഡ് സൺറൈസ് (2010), യു കാനോട്ട് ടേൺ എവേ (2011), ഇൻ എ ടൈം ഓഫ് ബേണിങ് (2013) എന്നിവയാണ് അദ്ദേഹത്തിന്റെ ഇംഗ്ലീഷ് ഭാഷയിൽ പ്രസിദ്ധീകരിച്ച കവിതാസമാഹാരങ്ങളിൽ ചിലത്. ഇരുപതിലധികം ഭാഷകളിലേക്ക് അദ്ദേഹത്തിന്റെ കവിതകളും ലേഖനങ്ങളും വിവർത്തനം ചെയ്യപ്പെട്ടിട്ടുണ്ട്. അങ്ങനെ, ഈഴം തമിഴ് ജീവിതത്തിന്റെ അനുഭവങ്ങളും ഭാവനകളും ഭാഷയുടെയും ഭൂമിശാസ്ത്രത്തിന്റെയും അതിരുകൾ കടന്ന് ലോകവായനക്കാരിലേക്ക് എത്തി.

ഓർമ്മയെയും സ്വത്വത്തെയും പലായനത്തെയും പഠിച്ച പണ്ഡിതൻ

സാഹിത്യജീവിതത്തോടൊപ്പം ചേരൻ ശ്രദ്ധേയമായൊരു അക്കാദമിക ജീവിതവും കെട്ടിപ്പടുത്തു. 2001-ൽ ടൊറന്റോയിലെ യോർക്ക് സർവകലാശാലയിൽനിന്ന് സോഷ്യോളജിയിൽ പിഎച്ച്ഡി നേടി. പിന്നീട് കാനഡയിലെ യൂണിവേഴ്സിറ്റി ഓഫ് വിൻഡ്സറിൽ പ്രൊഫസറായി സേവനമനുഷ്ഠിച്ചു. കുടിയേറ്റം, വംശീയത, ദേശീയത, സ്വത്വം, പ്രവാസിസമൂഹങ്ങൾ, അന്താരാഷ്ട്ര വികസനം തുടങ്ങിയ വിഷയങ്ങളിലായിരുന്നു അദ്ദേഹത്തിന്റെ അക്കാദമിക താൽപര്യങ്ങൾ. സംഘർഷവും പലായനവും ജന്മനാടിനോടുള്ള ബന്ധവും സ്വന്തം ജീവിതത്തെത്തന്നെ രൂപപ്പെടുത്തിയ ഒരാളുടെ അനുഭവബോധവും അദ്ദേഹത്തിന്റെ പാണ്ഡിത്യത്തിനൊപ്പം ചേർന്നു.

ദി സിക്സ്ത് ജെനർ: മെമ്മറി, ഹിസ്റ്ററി ആൻഡ് ദി തമിഴ് ഡയസ്പോറ ഇമാജിനേഷൻ, പാത്ത്‌വേസ് ഓഫ് ഡിസെന്റ്: തമിഴ് നാഷണലിസം ഇൻ ശ്രീലങ്ക, വേൾഡ് വിതൗട്ട് വാൾസ് എന്നിവ അദ്ദേഹത്തിന്റെ പ്രധാന അക്കാദമിക കൃതികളിൽപ്പെടുന്നു. ചരിത്രം, കൂട്ടായ ഓർമ്മ, രാഷ്ട്രീയ സ്വത്വം, അതിർത്തികൾക്കപ്പുറം ജീവിക്കുന്ന സമൂഹങ്ങളുടെ അനുഭവങ്ങൾ എന്നിവ തമ്മിലുള്ള ബന്ധമാണ് ഈ പഠനങ്ങൾ അന്വേഷിച്ചത്.

സർഗാത്മകവും അക്കാദമികവുമായ രണ്ട് ലോകങ്ങളെ പരസ്പരം സമ്പന്നമാക്കാൻ കഴിഞ്ഞതാണ് ചേരന്റെ പ്രത്യേകത. കവി പലായനത്തിന്റെ വൈകാരികമായ അനുഭവങ്ങളെ ആവിഷ്കരിച്ചപ്പോൾ, പണ്ഡിതൻ അതിന്റെ ചരിത്രപരവും സാമൂഹികവും രാഷ്ട്രീയവുമായ പശ്ചാത്തലങ്ങൾ പരിശോധിച്ചു. മനുഷ്യർ എങ്ങനെ ഓർക്കുന്നു, സ്വത്വങ്ങൾ എങ്ങനെ രൂപപ്പെടുന്നു, തങ്ങൾ ജനിച്ചുവളർന്ന ഇടങ്ങൾ നഷ്ടപ്പെടുകയോ മാറിമറിയുകയോ ചെയ്യുമ്പോൾ സമൂഹങ്ങൾ എങ്ങനെ തങ്ങളുടെ ഓർമ്മകൾ കാത്തുസൂക്ഷിക്കുന്നു — ഈ ചോദ്യങ്ങൾ രണ്ടിടങ്ങളിലും ഒരുപോലെ സജീവമായിരുന്നു.

ഭൂമിശാസ്ത്രത്തിന്റെ അതിരുകൾ കടന്ന കവിത

ചേരന്റെ സാഹിത്യയാത്രയിലെ ശ്രദ്ധേയമായൊരു നാഴികക്കല്ലായിരുന്നു 2025 ഓഗസ്റ്റിൽ പ്രസിദ്ധീകരിച്ച ലാസോ ദിയവേന ബൂമിയ (ഉരുകിയൊഴുകുന്ന ദുഃഖത്തിന്റെ ഭൂമി) എന്ന കൃതി. അദ്ദേഹത്തിന്റെ തിരഞ്ഞെടുത്ത കവിതകളുടെ സിംഹള ഭാഷയിലുള്ള പുസ്തകരൂപത്തിലുള്ള വിവർത്തനമായിരുന്നു ഇത്.

ശ്രീലങ്കൻ അഭിഭാഷകയും വിവർത്തകയുമായ സഞ്ജുല പീറ്റേഴ്സ് ആണ് ഈ സമാഹാരം വിവർത്തനം ചെയ്തത്. 2025 ഓഗസ്റ്റ് 12-ന് കൊളംബോയിലെ ദേശീയ ഗ്രന്ഥശാലയിൽ പുസ്തകം പ്രകാശനം ചെയ്തു. ചേരന്റെ ചില കവിതകൾ ഇതിനുമുമ്പും സിംഹള ഭാഷയിൽ പ്രസിദ്ധീകരിക്കപ്പെട്ടിരുന്നുവെങ്കിലും, അദ്ദേഹത്തിന്റെ കവിതകളുടെ ഒരു തിരഞ്ഞെടുപ്പ് പുസ്തകരൂപത്തിൽ സിംഹള വായനക്കാർക്കു മുന്നിലെത്തിയത് ഈ പ്രസിദ്ധീകരണത്തിലൂടെയായിരുന്നു.

വിവർത്തനത്തെ “തമിഴ് ജനതയോടും അവരുടെ പ്രതിരോധത്തോടുമുള്ള സർഗാത്മകമായ ഐക്യദാർഢ്യത്തിന്റെ പ്രവൃത്തി” എന്നാണ് ചേരൻ വിശേഷിപ്പിച്ചത്. ആ വാക്കുകൾക്ക് സവിശേഷമായൊരു പ്രാധാന്യമുണ്ട്. ഇവിടെ വിവർത്തനം എന്നത് ഒരു ഭാഷയിൽനിന്ന് മറ്റൊരു ഭാഷയിലേക്കുള്ള കവിതയുടെ സഞ്ചാരം മാത്രമല്ല. ഒരു ജനതയുടെ അനുഭവങ്ങളും ഓർമ്മകളും മറ്റൊരു ഭാഷയിലും സംസ്കാരത്തിലും ജീവിക്കുന്ന വായനക്കാർക്ക് പരിചിതമാക്കാനുള്ള ശ്രമം കൂടിയാണ്. രാഷ്ട്രീയ ചരിത്രങ്ങൾ ആഴത്തിലുള്ള വിഭജനങ്ങൾ സൃഷ്ടിച്ചിടത്തുപോലും സാഹിത്യത്തിന് പരസ്പരധാരണയുടെ പാലങ്ങൾ പണിയാൻ കഴിയുമെന്ന പ്രതീക്ഷയാണ് അത് മുന്നോട്ടുവെച്ചത്.

അദ്ദേഹത്തിന്റെ രചനകൾ ഇതിനകം തന്നെ ഭൂഖണ്ഡങ്ങളും ഭാഷകളും കടന്നുപോയിരുന്നു. എന്നാൽ സിംഹള വായനക്കാരുമായുള്ള ഈ സംവാദം ആ യാത്രയ്ക്ക് പുതിയൊരു മാനം നൽകി. ഒരു പ്രത്യേക ചരിത്രത്തിൽ വേരൂന്നിയ കവിതയ്ക്ക്, അതിന്റെ ഉത്ഭവസത്യങ്ങൾ നഷ്ടപ്പെടുത്താതെ ആ ചരിത്രത്തിന്റെ അതിരുകൾക്കപ്പുറത്തേക്കും സംസാരിക്കാനാകുമെന്ന് അത് തെളിയിച്ചു.നാടകവേദിയിലും ചേരൻ തന്റെ സർഗാത്മകത അടയാളപ്പെടുത്തി. നോട്ട് ബൈ ഔർ ടിയേഴ്സ് എന്ന അദ്ദേഹത്തിന്റെ നാടകം 2009 നവംബറിൽ ടൊറന്റോയിൽ അരങ്ങേറി. ഓർമ്മ, സംഘർഷം, അക്രമത്തിന്റെ മാനുഷിക പ്രത്യാഘാതങ്ങൾ എന്നിവയോടുള്ള അദ്ദേഹത്തിന്റെ അന്വേഷണങ്ങൾ നാടകത്തിലേക്കും വ്യാപിച്ചു.

കവിതയ്ക്കപ്പുറത്തെ മനുഷ്യൻ

ചേരനെപ്പോലൊരു എഴുത്തുകാരനെ ഓർക്കുമ്പോൾ അദ്ദേഹത്തിന്റെ ജീവിതത്തെ പുസ്തകങ്ങൾ, വിവർത്തനങ്ങൾ, അക്കാദമിക പദവികൾ, സാഹിത്യ അംഗീകാരങ്ങൾ എന്നിവയിലൂടെ അളക്കാൻ എളുപ്പമാണ്. ആ നേട്ടങ്ങൾ തീർച്ചയായും പ്രധാനപ്പെട്ടവയാണ്. തമിഴിൽ പതിനഞ്ചിലധികം പുസ്തകങ്ങൾ അദ്ദേഹം രചിച്ചു. അദ്ദേഹത്തിന്റെ കവിതകളും ലേഖനങ്ങളും ഇരുപതിലധികം ഭാഷകളിലേക്ക് വിവർത്തനം ചെയ്യപ്പെട്ടു. എന്നാൽ ഒരു മനുഷ്യന്റെ ജീവിതത്തിന്റെ അളവുകോൽ അദ്ദേഹത്തിന്റെ ഗ്രന്ഥസൂചികയിൽ മാത്രം ഒതുങ്ങുന്നില്ല.എന്നെ സംബന്ധിച്ചിടത്തോളം ചേരന്റെ വിയോഗം ഒരു സുഹൃത്തിന്റെ നഷ്ടം കൂടിയാണ്.

കവി, പത്രപ്രവർത്തകൻ, പ്രൊഫസർ എന്നീ വിശേഷണങ്ങൾക്കപ്പുറം ആശയങ്ങളും ചിന്തകളും അനുഭവങ്ങളും പങ്കുവെക്കാൻ കഴിയുന്ന ഒരാളായിരുന്നു അദ്ദേഹം. ലോകത്തോടുള്ള അദ്ദേഹത്തിന്റെ ഇടപെടലുകളിൽനിന്ന് വേർപെടുത്താനാവാത്തതായിരുന്നു ബൗദ്ധികമായ ജിജ്ഞാസയും സാഹിത്യബോധവും. ഒരു സംഭാഷണം അവസാനിച്ചുകഴിഞ്ഞാലും അതിലെ ചിന്തകൾ നമ്മോടൊപ്പം ഏറെ ദൂരം സഞ്ചരിക്കുന്ന അപൂർവം എഴുത്തുകാരിൽ ഒരാളായിരുന്നു അദ്ദേഹം.അദ്ദേഹത്തിന്റെ കവിതകളിലൂടെയും ആശയങ്ങളിലൂടെയും മാത്രമല്ല, ഞങ്ങൾ പങ്കിട്ട സൗഹൃദത്തിലൂടെയും മാനുഷികമായ അടുപ്പത്തിലൂടെയും ഞാൻ അദ്ദേഹത്തെ ഓർക്കും.

തമിഴ് സാഹിത്യസമൂഹത്തിനും പ്രവാസം, സംഘർഷം എന്നിവയെക്കുറിച്ച് പഠിക്കുന്ന പണ്ഡിതർക്കും ലോകത്തിന്റെ വിവിധ ഭാഗങ്ങളിലുള്ള വായനക്കാർക്കും ചേരന്റെ വിയോഗം ആഴത്തിലുള്ള നഷ്ടമാണ്. പലപ്പോഴും വാക്കുകളിലാക്കാൻ പ്രയാസമുള്ള അനുഭവങ്ങൾക്ക് ഭാഷ കണ്ടെത്തിയ കവിയായിരുന്നു അദ്ദേഹം.യാഴ്പാണം പൊതുഗ്രന്ഥശാല കത്തിക്കപ്പെട്ടു. ഒരു ജന്മനാട് മുറിവേറ്റു. ഒരു തലമുറ ഭൂഖണ്ഡങ്ങൾക്കപ്പുറം ചിതറിപ്പോയി. എങ്കിലും വാക്കുകൾ അതിജീവിച്ചു.ആർ. ചേരൻ തന്റെ ജന്മനാടിനെ കവിതയിൽ പേറി. ആ കവിതകളിലൂടെ അതിന്റെ ഓർമ്മകൾ തീരങ്ങൾക്കപ്പുറത്തേക്കും സഞ്ചരിക്കുമെന്ന് അദ്ദേഹം ഉറപ്പാക്കി.അങ്ങനെയാണ് ഒരു കവി മരണത്തിനപ്പുറവും ജീവിക്കുന്നത്.

 

Hot this week

ലൈറ്റു മരിച്ചേ ഒരു തുടർനാടകം

(കാലടിശ്രീശങ്കരാചാര്യ സംസ്കൃത സർവ്വകലാശാലയിലെ വിദ്യാർഥികൾ ലൈറ്റ് മരിച്ചേ എന്ന നാടകം കളിച്ചതിന്...

കുടിയൊഴിപ്പിക്കലും പുനരധിവാസവും: കേരളത്തിലെ അനുഭവം

വികസന പ്രൊജക്ടുകൾക്കായി താമസസ്ഥലത്തുനിന്നും പ്രദേശവാസികളെ കുടിയൊഴിപ്പിക്കുന്നതിനെക്കുറിച്ചും പുനരിധിവാസത്തെക്കുറിച്ചും സാമൂഹ്യശാസ്ത്ര വിഷയങ്ങളിൽ അനേകം...

ഭാഷയ്ക്കും അക്ഷരങ്ങൾക്കും ഒരു മ്യൂസിയം

“മനുഷ്യ ജീവിതത്തിന്റെ ഒരംശത്തിന്റെ വ്യാഖ്യാനമാണ് കഥ”എന്ന കാരൂർ നീലകണ്ഠപ്പിള്ളയുടെ മനോഹരമായ വരിയാണ്...

കാഴ്‌ചയും കാഴ്‌ചക്കപ്പുറവും

തുടർച്ചയായി നടക്കുന്ന സ്റ്റോക്കിങ്‌ കൊലപാതകങ്ങളെയും സ്ത്രീകൾക്കെതിരെയുള്ള അതിക്രമങ്ങളെയും തടയാൻ പൊലീസും മാനസികാരോഗ്യ...

Topics

ലൈറ്റു മരിച്ചേ ഒരു തുടർനാടകം

(കാലടിശ്രീശങ്കരാചാര്യ സംസ്കൃത സർവ്വകലാശാലയിലെ വിദ്യാർഥികൾ ലൈറ്റ് മരിച്ചേ എന്ന നാടകം കളിച്ചതിന്...

കുടിയൊഴിപ്പിക്കലും പുനരധിവാസവും: കേരളത്തിലെ അനുഭവം

വികസന പ്രൊജക്ടുകൾക്കായി താമസസ്ഥലത്തുനിന്നും പ്രദേശവാസികളെ കുടിയൊഴിപ്പിക്കുന്നതിനെക്കുറിച്ചും പുനരിധിവാസത്തെക്കുറിച്ചും സാമൂഹ്യശാസ്ത്ര വിഷയങ്ങളിൽ അനേകം...

ഭാഷയ്ക്കും അക്ഷരങ്ങൾക്കും ഒരു മ്യൂസിയം

“മനുഷ്യ ജീവിതത്തിന്റെ ഒരംശത്തിന്റെ വ്യാഖ്യാനമാണ് കഥ”എന്ന കാരൂർ നീലകണ്ഠപ്പിള്ളയുടെ മനോഹരമായ വരിയാണ്...

കാഴ്‌ചയും കാഴ്‌ചക്കപ്പുറവും

തുടർച്ചയായി നടക്കുന്ന സ്റ്റോക്കിങ്‌ കൊലപാതകങ്ങളെയും സ്ത്രീകൾക്കെതിരെയുള്ള അതിക്രമങ്ങളെയും തടയാൻ പൊലീസും മാനസികാരോഗ്യ...

പ്രകൃതിയിലെ വിസ്മയങ്ങൾ -എഴുത്താണിപ്പച്ച

Acanthaceae സസ്യകുടുംബത്തിൽപ്പെട്ട, പടർന്നു വളരുന്നതും എന്നാൽ അടിഭാഗം കാഷ്ഠനിർമ്മിതവു (woody) മായിരിക്കുന്ന...

നിറങ്ങൾ തൻ നൃത്തം – ബദ്രി നാരായണൻ

ലോകപ്രശസ്ത ചിത്രകലാപ്രതിഭകളെ പൊന്ന്യം ചന്ദ്രൻ പരിചയപ്പെടുത്തുന്ന പംക്തി ‘നിറങ്ങൾ തൻ നൃത്തം 1929...

ചൈനീസ് സവിശേഷതകളോടു കൂടിയ സോഷ്യലിസം ; ഭാഗം-നാല്

1840-കളുടെ അവസാന പകുതിയിൽ മാർക്‌സും ഏംഗത്സും മുതലാളിത്ത സമൂഹത്തിൻ്റെ സാമ്പത്തിക ചരിത്രവും...
spot_img

Related Articles

Popular Categories

spot_imgspot_img