Baya weaver എന്ന തൂക്കണാം കുരുവി (Ploceus philippinus). ആറ്റകുരുവി, കൂരിയാറ്റ എന്നീ പേരുകളിലും അറിയപ്പെടുന്നു. 1766 ൽ സ്വീഡിഷ് ഭിഷഗ്വരനും ജീവശാസ്ത്രജ്ഞനുമായിരുന്ന Carl Linnaeus (1707 – 1778) ആണ് ഇതിനെ ആദ്യമായി രേഖപ്പെടുത്തിയത്. ഇവയുടെ കൂടു നിർമാണത്തെപ്പറ്റി മലയാളം വിക്കിപീഡിയ വളരെ രസകരമായ ചില വിവരങ്ങൾ പങ്കുവയ്ക്കുന്നുണ്ട്:
പെൺപക്ഷിയുടെ ഇഷ്ടാനുസരണമാണ് ആൺപക്ഷി കൂടുണ്ടാക്കുക. പെൺപക്ഷി കൂടുനിർമാണത്തിന്റെ വിവിധ ഘട്ടങ്ങളിൽ പരിശോധനയ്ക്കെത്തും. പരിശോധനയിൽ ബലക്ഷയം കണ്ടാൽ ആ കൂട് ഉപേക്ഷിക്കുകയാണ് ചെയ്യുക. അതിനുശേഷം ഇതേ പെൺപക്ഷിക്കു വേണ്ടിത്തന്നെ ആൺപക്ഷി അടുത്ത കൂടിന്റെ നിർമ്മാണം തുടങ്ങും. അങ്ങനെ പെൺപക്ഷിക്കു വേണ്ടി അഞ്ചുകൂടുകൾ വരെ ഉണ്ടാക്കുന്ന ആൺപക്ഷികൾ ഉണ്ട്.
വിക്കിപീഡിയയുടെ ഇംഗ്ലീഷുപതിപ്പിൽ ഇവയെപ്പറ്റി രസകരമായ വേറെയും കുറെയേറെ വിവരങ്ങളുണ്ട്:
“പരിശീലനം ലഭിച്ച ആറ്റക്കുരുവികൾ നടത്തുന്ന സാഹസങ്ങൾ വളരെ അത്ഭുതകരമാണ്. … യജമാനൻ ഒരടയാളം കാണിക്കുമ്പോൾ ഒരു മധുരപലഹാരം അതിന്റെ കൊക്കിൽ എടുത്ത് ഒരു സ്ത്രീയുടെ ചുണ്ടുകൾക്കിടയിൽ നിക്ഷേപിക്കുക, ഒപ്പം അവിടെയുള്ള എല്ലാ സ്ത്രീകളോടും ഈ ചടങ്ങ് ആവർത്തിക്കുക … ,പിന്നീട് ചെറിയ പീരങ്കി കൊണ്ടുവരുന്നു, അതിൽ പരുക്കൻ പൊടികൾ നിറയ്ക്കുന്നു….” എന്നെല്ലാം 1841 മുതൽ 1873 വരെ Royal Asiatic Society of Bengal മ്യൂസിയം ക്യൂറേറ്റർ ആയിരുന്ന Edward Blyth പറയുന്നു. ഒരു ചുള്ളിക്കമ്പിന്റെ രണ്ടു തലയും കത്തിച്ച് അതു തലയ്ക്കുമീതെ ഉയർത്തിക്കറക്കി കാണികളെ അത്ഭുതപ്പെടുത്തി യിരുന്നതായും അദ്ദേഹം പറയുന്നുണ്ട്. അകബർ ചക്രവർത്തിയുടെ കാലം മുതൽ ഇവയെക്കൊണ്ട് അഭ്യാസങ്ങൾ കാണിച്ചിരുന്നു എന്ന് 1590 ൽ എഴുതപ്പെട്ട ‘ Ain-i-Akbari’ എന്ന ചരിത്രഗ്രന്ഥത്തിൽ ഉണ്ട്. “ആറ്റക്കുരുവി അങ്ങേയറ്റം ബുദ്ധിയുള്ളതും അനുസരണയുള്ളതുമാണ്. അതു കാണികളുടെ കൈയിൽന്നും ചെറിയ നാണയങ്ങൾ എടുത്ത് യജമാനന്റെ അടുത്തേയ്ക്കു കൊണ്ടുചെന്നു കൊടുക്കും. വളരെ ദൂരെ നിന്നും യജമാനൻ വിളിച്ചാൽ അവ അടുത്തുവരും. വിദഗ്ദ്ധരായ കലാകാരന്മാരുടെ കഴിവിനെ വെല്ലുവിളിയ്ക്കുന്ന തരത്തിൽ അവയുടെ കൂടുകൾ വളരെ സമർത്ഥമായി നിർമ്മിച്ചിരിക്കുന്നു.”
