Tawny Coster എന്ന തീച്ചിറകൻ (Acraea terpsicore), Nymphalidae (brush-footed butterflies) കുടുംബത്തിൽപ്പെട്ട, തുകൽ പോലെയുള്ള ചിറകുകളുള്ള ഒരു ചെറിയ ചിത്രശലഭമാണ്. 1758-ൽ Carl Linnaeus (1707 – 1778) ആണ് ഇതിനെ ആദ്യമായി രേഖപ്പെടുത്തിയത്.
പാസിഫ്ലോറ (Passiflora) ഇനത്തിൽപ്പെട്ട സസ്യങ്ങളിൽ നിന്നു വേർതിരിച്ചെടുത്തു സ്വാംശീകരിക്കുന്ന വിഷവസ്തുക്കൾ പുഴുവിനും, പിന്നീടു പ്യൂപ്പയ്ക്കും പൂർണ്ണവളർച്ചയെത്തിയ ശലഭത്തിനും സംരക്ഷണം നൽകുന്നു. ഭക്ഷിച്ചാൽ ദോഷകരമാണെന്ന കാര്യം വിളിച്ചോതുന്ന തരത്തിലുള്ള പ്രത്യേക നിറങ്ങൾ (aposematic colors) പ്യൂപ്പയിൽ വ്യക്തമായി കാണാം. താങ്ങി ഉറപ്പിക്കുന്നതിനുള്ള പ്രത്യേക ഇഴകളുടെ സഹായമില്ലാതെയാണ് പ്യൂപ്പ സ്വതന്ത്രമായി തൂങ്ങിക്കിടക്കുന്നത്.
ലാർവ (പുഴു) ഘട്ടത്തിൽ ശേഖരിച്ച വിഷാംശം കാരണം, പൂർണ്ണവളർച്ചയെത്തിയ ചിത്രശലഭത്തെയും മിക്ക ഇരപിടിയൻ ജീവികളും ഒഴിവാക്കാറുണ്ട്. കൂടാതെ, കാലുകളുടെ സന്ധികളിലുള്ള ഗ്രന്ഥികളിൽ നിന്നും പുറപ്പെടുവിക്കുന്ന, അരോചകവും ദുർഗന്ധമുള്ളതുമായ മഞ്ഞനിറത്തിലുള്ള ദ്രാവകവും ഇതിനെ ഇരപിടിയന്മാരിൽ നിന്നും സംരക്ഷിക്കുന്നു. എന്നിട്ടും ആക്രമിക്കപ്പെട്ടാൽ, ചത്തതുപോലെ അഭിനയിക്കുകയും, അപകടം ഒഴിഞ്ഞാലുടൻ പറന്നുയർന്നു യാത്ര തുടരുകയും ചെയ്യുന്നു. കൂടാതെ, ഇതിന്റെ കടുപ്പമുള്ള പുറംചട്ട (exoskeleton) കുറേയൊക്കെ പക്ഷികളുടെ കൊത്തലേറ്റാലും പല്ലികളുടെ കടിയേറ്റാലും അതിജീവിക്കാൻ ഇതിനെ സഹായിക്കുന്നു.
ഇണചേരലിനുശേഷം പെൺശലഭങ്ങളിൽ ‘sphragis’ (copulatory plug) രൂപപ്പെടുന്ന ഒരു വിഭാഗം ശലഭങ്ങളിൽ ഇതുൾപ്പെടുന്നു. ആൺശലഭം ‘spermatophore’ (ബീജപ്പൊതി) കൈമാറിയതിനുശേഷം, തന്റെ വേറൊരു ഗ്രന്ഥിയിൽ നിന്നുള്ള ഒരുതരം മെഴുകുപോലെയുള്ള സ്രവം പെൺശലഭത്തിന്റെ ജനനേന്ദ്രിയ ദ്വാരത്തിലൂടെ പകരുകയും അതു പുറത്തേയ്ക്ക് ഒഴുകി ഉറച്ച് ഒരു അടപ്പായി രൂപപ്പെടുകയും ചെയ്യുന്നു. മറ്റ് ആൺശലഭങ്ങളുമായുള്ള ഇണചേരൽ തടയുന്നതിനാണ് ഇത്.
