തേൻകൊതിച്ചിപ്പരുന്ത് (Pernis ptilorhynchus) Accipitridae കുടുംബത്തിൽപ്പെട്ട ഒരു ഇരപിടിയൻ പക്ഷിയാണ്. The crested honey buzzard, Oriental honey buzzard, Asiatic honey buzzard, or Eastern honey buzzard ‘എന്നെല്ലാം ഇതിന് പേരുകളുണ്ട്. തേനീച്ചക്കൂടുകളിൽ നിന്നും കടന്നൽക്കൂടുകളിൽ നിന്നും വേർതിരിച്ചെടുക്കുന്ന അവയുടെ ലാർവകളും തേനും പ്രധാന ഭക്ഷണമായതിനാലാണ് ഇവയ്ക്ക് ‘ഹണി ബസാർഡ്’ (തേൻകൊതിച്ചിപ്പരുന്ത്) എന്ന പേരു ലഭിച്ചത്. ഡച്ച് ജന്തുശാസ്ത്രജ്ഞനും മ്യൂസിയം ഡയറക്ടറുമായിരുന്ന Coenraad Jacob Temminck (1778 – 1858) ആണ് 1821-ൽ ഇതിനെ ആദ്യമായി രേഖപ്പെടുത്തിയത്.
പ്രജനനത്തിനായി വേനൽക്കാലത്ത് ഇവ സൈബീരിയയിലേക്കും ജപ്പാനിലേക്കും ദേശാടനം നടത്തുന്നു. ജപ്പാനിലെ പ്രജനന കേന്ദ്രങ്ങളിൽ നിന്ന് തെക്കുകിഴക്കൻ ഏഷ്യയിലെ ശൈത്യകാല വാസസ്ഥലങ്ങളിലേക്ക് മടങ്ങുമ്പോൾ ഇവ കിഴക്കൻ ചൈനാ കടലിനു മുകളിലൂടെ പറക്കുന്നു. ശരത്കാലത്ത് കടലിനു മുകളിലുള്ള കാറ്റ് പക്ഷികൾ പറക്കുന്ന അതേ ദിശയിൽ വീശുന്നതിനാൽ, കാറ്റിന്റെ സഹായത്തോടെ, 700 കിലോമീറ്ററോളം ദൂരം കടലിനു മുകളിലൂടെ നിർത്താതെ പറക്കാൻ ഇവയ്ക്ക് സാധിക്കുന്നു. ഇവയിൽ ചിലത് തെക്കുകിഴക്കൻ ഏഷ്യയിൽ വർഷം മുഴുവനും വസിക്കുന്നവയുമാണ്.
ഇതിന് ഇതിന്റെ പ്രത്യേക ഭക്ഷണരീതിയുമായി പൊരുത്തപ്പെടുന്ന പല ശാരീരിക സവിശേഷതകളുമുണ്ട്. ഭൂമിക്കടിയിലുള്ള കൂടുകളിൽ നിന്ന് ഭക്ഷണം തേടുന്നതിനായി നീളമേറിയ തലയും, കടന്നലുകളുടെ കൂടുകളിലെ അറകളിൽ നിന്ന് അവയുടെ ലാർവകളെ (grubs) പുറത്തെടുക്കുന്നതിനായി നാക്കിലുള്ള പ്രത്യേക ചാലുമാണ് ഇതിൽ പ്രധാനപ്പെട്ടവ. കൂട്ടമായി ജീവിക്കുന്ന കടന്നലുകളുടെ കുത്തുകളിൽ നിന്ന് സംരക്ഷണം നൽകുന്നതിനായി തലയിലും കഴുത്തിലും ചെറിയതും ഇടതിങ്ങിയതുമായ തൂവലുകളുടെ ഒരു ആവരണവുമുണ്ട്.
ഇവിടെ കാണപ്പെടുന്ന Pernis ptilorhynchus ruficollis എന്ന ഉപവർഗ്ഗത്തെ 1830ൽ ആദ്യമായി രേഖപ്പെടുത്തിയത്, പ്രശസ്തനായ ഫ്രഞ്ച് ശസ്ത്രക്രിയാവിദഗ്ധനും പ്രകൃതിശാസ്ത്രജ്ഞനുമായ René Primevère Lesson (1794–1842) ആണ്.
ഈ വർഷം ഏപ്രിലിലാണ് ഞാൻ ഈ ചിത്രം പകർത്തിയത്.
